4. Inuusuttut oqaqqaarput
Wilma Jensén |
2025-mi juunimi inuusuttut Nunani Avannarlerneersut aamma Nunani Baltikuneersut Helsingforsemi ataatsimiipput. Tassani ulluni marlunni apeqqut una pillugu oqaloqatigiipput: Pingaarutilinnik pisoqartillugu, meeqqat inuusuttullu qanoq ilillutik tusarnaarneqarnissaat qulakkeerneqarsinnaava?
Takkutinnginnerminni, inersimasut atuakkamut matumunnga allassimasaat atuaqqaarsimavaat. Ataatsimiinnerullu kingorna namminneq qanoq isumaqarnerlutik, suullu amigaatigineqarnersut oqaluttuarivaat. Uku tassaapput taakkununnga pingaarnerpaasimasut.
Aperineq aamma tusarnaarneq assigiinngillat
Inuusuttut oqariartuuteqarput, inersimasunngooq taakkuninnga marlunnik immikkoortitserpiarsinnaanngitsut. Qanoq isumaqarninnik aperineqarsinnaavutit, kisianni tamanna isumaqanngilaq isummat aalajangiinermut sunniuteqassasoq.
Taamaattumik inuusuttut kissaatigaat suna pineqarnersoq erseqqissumik oqaatigineqartassasoq. Aamma Inuusuttut paasiumavaat, aalajangiinermut isumaat sunniuteqassanersoq, aperineqaannarunimmi aalajangiinernulli sunniuteqartussaanatik taava tamatuminnga paasitinneqaqqaartarusupput. Taamaalillutik nalussanngilaat ilumut peqataatinneqarnerlutik.
Ajornartorsiulinnginnermi piareersimasoqartariaqarpoq
Tassa taanna inuusuttut pingaarnerpaatitaat. Ajornartorsiortoqalereersoq aatsaat eqqarsaatigineqarsinnaanngilaq meeqqat qanoq tusaaniarneqassanersut.
Meeqqat qanoq tusarnaarneqarsinnaanersut siusissukkut isumaqatigiissutigineqareersimasussaavoq, ulluinnarnilu atuutilereertussaalluni. Taamaaliornikkut ajornartorsiortoqaleraangat aaqqissuussineq taanna ilisimaneqareerlunilu atorneqarsinnaassaaq.
Ajornartorsiortoqartillugu Inuusuttut suleqatigiissitaat
Inuusuttut nammineq siunnersuutigaat Ajornartorsiortoqartillugu Inuusuttut Suleqatigiissitaannik pilersitsisoqassasoq, tassani pingaarutilinnik pisoqartillugu inuusuttut peqataasassapput. Suliassanik namminneq suliarisinnaasaminnik suliakkerneqartassapput, imaanngitsoq isumaanik kisimi paasiniaavigineqarlutik.
Suleqatigiissitaq atuarfimmiissinnaavoq, soorlu atuartut sinniisaat. Aamma inuusuttut kissaatigaat taama ittunik sumiiffinni tamani suleqatigiissitaqartoqassasoq – illoqarfinni, illit nunangisanni aamma nunat allat akornanni.
Inuusuttut ilaat siunnersuutaat amerlanerupput: suleqatigiissitat marluk pilersinneqassasut, aappaa inuusuttunut aappaalu inersimasunut. Taakku marluk sanileriillutik sulisassapput. Taamaalilluni inuusuttut isumaat ersarissumik takuneqarsinnaassapput.
Ilaat tusaaneqarneq ajorput
Inuusuttut namminneq aamma tamanna pillugu unneqqaripput. Inuusuttut aalajangersimasut kisimik aperineqakulasarput, tassa taakku suliniuteqareersut aammalu oqalliseqataasartut. Ataatsimiinnermi inuusuttoq ataaseq oqaaseqartarpoq, kisianni inuusuttut tusindilikkuutaat aperineqarsimanngitsut sinnerlugit oqaaseqarsinnaanngilaq.
Inuusuttut isumaqarput namminneq inuusuttoqatiminnut apersuisassappata pitsaanerussasoq. Peqatiminiimmi aperineqarneq inersimasumiillu aperineqarneq assigiinneq ajorput.
Peqataallutik suleqataarusupput
Isummatik tusaaneqareerpata, qujaffigineqaannarusunngillat. Kisiannili suleqatitut pineqarusupput allanngueqataasinnaallutik tamatigullu peqataasinnaallutik, aammalu oqaasiinnaanngitsumik ilumoortunilli suliniutinik pilersitsisoqassasoq kissaateqarput.
