1. Siulequt
Una qupperneq inersimasunut atuagassaavoq. Meeraaguit quppernerup tullianiit aallartissaatit.
Una atuagaq Participation is Protection – Embedding Children's Rights in Nordic Crisis Governance-imik qulequtalik meeqqanut paasiuminartunngorlugu allanneqarsimavoq. Nalunaarusiami Covid-19-ip tuniluunnerata nalaani Nunani Avannarlerni meeqqat tusaaneqarnissamik pisinnaatitaaffiat qanoq eqquutsinneqarsimanersoq tamakkiisumik misissorneqarpoq. Paasisat pingaarnerpaat ilaat tassa meeqqat inuunerminni pissutsinik allanngortitsisumik aalajangiisoqarnerani amerlanertigut peqataatinneqarsimannginnerat. Aammalu aalajangiisoqareersimatillugu meeqqat aatsaat aperineqartarneri, taamaalillunilu oqaaserisaasa sunniuteqarnissaat kingusinaareertarluni.
Taakku paasisimalikkat pillugit nalunaarusiaq inersimasunuinnaq saqqummiunneqassagaluarpat, nalunaarusiami kukkussutaasimasutut oqaatigineqartoq uteqqinneqassagaluarpoq. Taamaattumik una atuagaq meeqqat qulinik ukiullit missaanniittunut atuaruminartumik allanneqarsimavoq, aammali taakku qanigisaannut soorlu atuarfinni, peqqissutsimut isumaginninnermullu sullissivinni kiisalu meeqqanut tunngasunik aalajangiisartuni sulisunut.
Una atuagaq eqikkaanerinnaanngilaq. Immikkoortumi ataatsimoorussami meeqqat tusaaneqarnissamik pisinnaatitaaffiat pillugu, inuusuttut namminneq suut pingaarnerutillugit oqaatigisaat, kiisalu Naalakkersuisunut suut piumasarineqarnersut pillugit nassuiaatitaqarpoq. Nunat ataasiakkaat Oqaaseqartartuisa allaffeqarfiisa, nunaminni qanoq pisoqarsimanersoq pillugu immikkoortoq, nunaminni oqaatsitik atorlugit allassimavaat.
Una atuagaq meeqqat pillugit atuagassiaannaasussaanngilaq, meeqqalli peqatigalugit atuarneqassalluni.