3. Oqaaseqarsinnaanissat pisinnaatitaaffigivat – Artikel 12
Sigurveig Þórhallsdóttir |
Illit tusaaneqartussaavutit
Illit pisinnaatitaaffigaat, illit inuuninnut tunngasunik aalajangiisoqartillugu qanoq isumaqarninnik oqarsinnaallutit. Pisinnaatitaaffik taanna FN-ip Meeqqat Pisinnaatitaaffii pillugit Isumaqatigiissutaani artikel 12-imi allassimavoq. Tassa imaappoq, inersimasut illit isummannik, misigissusinnik kissaatinnillu oqaatiginnissinnaanissamut periarfissittussaagaatsit. Oqaatsitillu tusaaniartussaavaat pimoorullugillu. Tamanna aalajangiisoqartillugu atuuppoq, soorlu angerlarsimaffinni, atuarfimmi, peqqinnissaqarfimmi imaluunniit pisortat sullissineranni.
Illit isummat pingaaruteqarpoq
Meeqqat namminneq inuunertik qanoq innersoq nalunngittorujussuusarpaat. Illit nammineq nalunngilat qanoq misiginerlutit, suna ernumaginerlugu suullu ilinnut pingaaruteqarnersut. Inersimasut illit inuuninnut sunniuteqartunik aalajangiissagaangamik paasissutissat tamakku pisariaqartittarpaat. Illit tusaaneqartussaanerit imaanngilaq inersimasut piumasatit tamaasa malillugit iliussasut. Kisiannili imaappoq aalajangiigaangamik, oqaatsitit eqqarsaatigilluartussaagaat. Peroriartortillutit inerisimaneruleriartortillutillu isummat suli annerusumik pingaartinneqartariaqarpoq. Kisianni imaanngilaq meeqqat anginerit kisimik tusaaneqartassasut. Meeqqat mikinerit aamma tusaaneqarnissamik pisinnaatitaaffeqarput.
Paasissutissiisoqartartussaavoq
Isummannik oqaatiginninnginninni, suna pineqarnersoq paasilluaqqaartartussaavat. Inersimasut paasissutissanik ilinnut paasiuminartumik nassuiaassisartussaapput. Arlaannik paasiuminaatsitaqaruit, apeqquteqarsinnaasariaqarputit. Aamma immaqa qanoq isumaqarninnik oqartinnak, eqqarsarnissamut piffissamik pisariaqartitsisinnaavutit. Paasissutissat naammattut iluaqutigalugit qanoq isumaqarninnik aamma qanoq oqarnissannik eqqarsarluaqqaarsinnaavutit.
Oqarusunnerlutit nammineq aalajangissavat
Isummannik oqaasinnguinissat pisinnaatitaaffigivat, kisianni taamaaliortariaqanngilatit. Oqarusunngikkuit, oqanngiinnarsinnaavutit. Aamma nalorniguit nalorninerarsinnaavutit, eqqarsaatigaluguluunniit. Paasissutissanik amerlanerusunik pisariaqartitsiguit imaluunniit eqqarsarnissamut piffissamik pisariaqartitsiguit, aamma tamanna oqaatigisinnaavat. Oqaasinnguerusunngikkuit, inersimasut oqartinniartussaanngilaatsit.
Tusarnaarneqarnissaq oqarsinnaanermit pingaaruteqarneruvoq
Isummannik oqaatiginnissinnaatitaavutit. Kisianni illit inuuninnut tunngasumik aalajangiisoqassatillugu, oqaasinnguineq kisimi naammanneq ajorpoq. Inersimasut illit oqaatsinnik tusarnaartussaapput aamma qanoq isumaqarnersutit eqqarsaatigalugu aalajangiisussaapput. Illit isummat aalajangiinermi sunniuteqarnissaa pingaaruteqarpoq.
Peqataanissaq qanoruna isumalik?
Immaqa ilaannikkut tusaasarpatit inersimasut oqaloqatigiittut, meeqqanngooq peqataatinneqartariaqarput.
Meeqqat peqataatinneqarnerat imatut isumaqarpoq:
- paasissutissanik paasiuminartunik tunineqartassapput
- isummaminnik oqaluttuarsinnaassapput
- inuunerminnut tunngassuteqartuni aalajangiinerni peqataatinneqartassapput
Ilaanni tamanna meeqqamut ataatsimut tunngasarpoq. Assersuutigalugu atuarfimmi pissutsinut imaluunniit ikiorneqarnissamut tunngasumik illit qanoq isumaqarnersutit aperineqarsinnaavutit.
Aamma ilaanni meeqqat ataatsimoorlutik isummaminnik oqaatiginnissinnaapput. Assersuutigalugu malittarisassat, pinnguartarfiit, angallannermi periarfissat imaluunniit meeqqanut sunniuteqartunik inatsisissatut siunnersuutit pillugit meeqqat qanoq isumaqarnersut aperineqarsinnaapput.
Tusarnaarneqarnissamut pisinnaatitaaffik pisinnaatitaaffinnut allanut aamma attuumassuteqarpoq
Meeqqat Pisinnaatitaaffii pillugit Isumaqatigiissummi tunngaviit pingaarnerit sisamat allassimasut ukuupput:
Artikel 2 – Meeqqat tamarmik pisinnaatitaaffeqarput. Kinaassuseq, suminngaanneerneq imaluunniit qanoq ittuuneq apeqqutaatinnagu tamarmik naligiipput.
Artikel 3 – Inersimasut aalajangiigaangamik meeqqamut pitsaanerpaamik iluaqutaasussaq tunngavigisussaavaat.
Artikel 6 – Meeqqat tamarmik inuuneqarnissamut, peroriartornissamut ineriartornissamullu pisinnaatitaaffeqarput.
Artikel 12 – Meeqqat tamarmik tusarnaarneqarnissamut pisinnaatitaaffeqarput.
Pisinnaatitaaffiit taakku tamarmik imminnut attuumassuteqarput. Assersuutigalugu, inersimasut illit isummersuutinnik tusaanngikkunik, qanoq ilillutik nalunngissinnaavaat suna ilinnut pitsaanerpaajunersoq? Taamaattumik meeqqat isummersuutiminnik oqaatiginnissinnaanissaat aammalu tusarnaarneqartarnissaat meeqqat pisinnaatitaaffiisa pingaaruteqartorujussuit ilagaat.